पृष्ठ:प्रेमघन सर्वस्व भाग 1.djvu/६४८

—६२७—

होली खेलत है ब्रजराज मिलि ब्रज कामिनी॥टेक॥
स्याम लिये पिचकारी कनक कर बरसावत रंग आवै
इत सों चलत कुंकुमा कुञ्जनि कूँजि रहो संग साज
⁠स्वर कल कामिनी॰
श्री बदरी नारायन जू कवि राग फाग यह गावै
नटवर रसिक शिरोमणि मोहन जू मन मोहन काज
⁠अलि गज गामिनी॰
होली खेलत सुन्दर श्याम संग ब्रज भामिनी॥टेक॥
भाल गुलाल मलत हिलि मिलि अति युगल छटा अभिराम
⁠जनु घन दामिनी॰
बद्रीनाथ गालियां गावत लै मोहन को नाम
⁠कुञ्जर गामिनी॰
जुबना बैरी भयो—कैसे दधि बेचन ब्रज जांव॥टेक॥
या जुबना लखि को नहिं मोहत, याही डरनि डेरांव,
अति उतङ्ग छतियन पर छलकत कैसे तिनहि छिपांव,
⁠जुबना बैरी भयो॰
औचक आनि लगत छतियां नित मोहन जाको नांव,
अब नहिं और उपाय सखी री तजियत गोकुल गांव,
⁠जुबना बैरी भयो॰
नट नागर आगर गुन गागर फोरत हौं सकुचांव,
नहि कछु सुनत करत निज मन की लाख भांति समुझांव,
⁠जुबना बैरी भयो॰
लँगर डगर बिच करत ठिठोली मैं बारी सरमांव,
बद्रीनाथ लेत मन बरबस करि करि लाखन दांव,
⁠जुबना बैरी भयो॰