पृष्ठ:भ्रमरगीत-सार.djvu/२०९

भ्रमरगीत-सार

१३२

 

राग सारंग

⁠आए नँदनन्दन के नेव^[१]।
गोकुल आय जोग बिस्तार्‌यो, भली तुम्हारी टेव॥
जब बृन्दाबन रास रच्यो हरि तबहि कहाँ तू हेव^[२]।
अब जुवतिन को जोग सिखावत, भस्म अधारी सेव॥
हम लगि तुम क्यों यह मत ठान्यो ज्यों जोगिन को भोग^[३]।
सूरदास प्रभु सुनत अधिक दुख, आतुर बिरह-बियोग॥३३९॥

⁠मनौ दोउ एकहि मते भए।
ऊधो अरु अक्रूर बधिक दोउ ब्रज आखेट ठए^[४]॥
बचन-पास बाँधे माधव-मृग, उनरत^[५] घालि लए।
इनहीं हती मृगी-गोपीजन सायक-ज्ञान हए॥
बिरह-ताप को दवा देखियत चहुं दिसि लाय दए।
अब धौं कहा कियो चाहत हैं, सोचत नाहिंन ए॥
परमारथी ज्ञान^[६] उपदेसत बिरहिन प्रेम-रए^[७]।
कैसे जियहि स्याम बिनु सूर चुम्बक मेघ गए॥३४०॥

⁠या ब्रज सगुन-दीप^[८] परगास्यो।
सुनि ऊधो! भृकुटी त्रिबेदि^[९] तर निसिदिन प्रगट अभास्यो॥
सब के उर-सरवनि^[१०] सनेह भरि सुमन तिली को बास्यो।

---

1. नेव=नायब, मंत्री।
2. हेव=ह्यो, तू था।
3. जोगिन को भोग=जैसे योगियों के लिए भोग वैसे ही हमारे लिए योग।
4. ठए=ठाना।
5. उनरत=उछलते हुए।
6. परमारथी ज्ञान=पारमार्थिक ज्ञान, ब्रह्मज्ञान।
7. रए=रंगे।
8. सगुन-दीप=सगुण ज्योति को जगानेवाला दीपक।
9. त्रिवेदि=त्रिपाई, चौकी
10. उर-सरवनि=हृदय रूपी शराब या पात्र।