पृष्ठ:भ्रमरगीत-सार.djvu/१०५

भ्रमरगीत-सार

२०

 

अँखिया हरि-दरसन की भूखी।

कैसे रहैं रूपरसराची ये बतियाँ सुनि रूखी॥
अवधि गनत इकटक मग जोवत तब एती नहिं झूखी^[१]।
अब इन जोग-सँदेसन ऊधो अति अकुलानी दूखी॥
बारक^[२] वह मुख फेरि दिखाओ दुहि पय पिवत पतूखी^[३]।
सूर सिकत हठि नाव चलाओ ये सरिता हैं सूखी^[४]॥४२॥

राग सारंग
जाय कहौ बूझी कुसलात।

जाके ज्ञान न होय सो मानै कही तिहारी बात॥
कारो नाम, रूप पुनि कारो, कारे अंग सखा सब गात।
जौ पै भले होत कहुँ कारे तौ कत बदलि सुता लै जात^[५]॥
हमको जोग, भोग कुबजा को काके हिये समात?
सूरदास सेए सो पति कै पाले जिन्ह तेही पछितात॥४३॥

कहाँ लौं कीजै बहुत बड़ाई।

अतिहि अगाध अपार अगोचर मनसा तहाँ न जाई॥
जल बिनु तरँग, भीति बिनु चित्रन, बिन चित ही चतुराई।
अब ब्रज में अनरीति कछू यह ऊधो आनि चलाई॥
रूप न रेख, बदन, बपु जाके संग न सखा सहाई।
ता निर्गुन सों प्रीति निरंतर क्यों निबहै, री माई?
मन चुभि रही माधुरी मूरति रोम रोम अरुझाई।
हौं बलि गई सूर प्रभु ताके जाके स्याम सदा सुखदाई॥४४॥

---

1. झूखी=सन्तप्त हुई।
2. बारक=एक बार।
3. पतूखी=पत्ते का दोना।
4. सूर...सूखी=व्यर्थ बालू में नाव चलाते हो, ये सूखी नदियाँ हैं।
5. तौ कत......लै जात=तो क्यों लड़के (कृष्ण) को बदलकर लड़की ले जाते?