९० दोसौ बावन वैष्णवन की वार्ता महाप्रसाद लिवाय के पाछे आप महाप्रसाद लेते ।' और जितनो द्रव्य कमावते वह सव श्रीगुसांईजी कों पधराय भेंट करि देते । और गृहस्थाई में खरच प्रमान सों करते । और आप सदा सुलभ स्वभाव सों ही रहते । और ब्रह्मसंबंध करें पाछे जो द्रव्य कमावते वह. सव श्रीगुसांईजी को जानते । और ठौर वोहोत खरचते नाहीं। या द्रव्य सों वोहोत डरपते। सो ऐसें श्रीठाकुरजी की सेवा करते । सो श्रीठाकुरजी सानु- भावता जनावते । व्रजलीला को अनुभव करावते । सो वे देवाभाई ऊपर श्रीगुसांईजी सदैव प्रसन्न रहते । भावप्रकाश-या वार्ता को अभिप्राय यह है, जो - वैष्णव निवेदन को सदा सर्वदा स्मरन राखे। अपने द्रव्यादिक को और ठौर खर्च करे नाहीं। काहेत? जो - ये प्रभुन को द्रव्य है । तातें अन्य विनियोग होन न दे। या प्रकार अनन्य व्है सेवा करे तो ठाकुर निश्चय अनुभव जतावे । सो वे देवाभाई श्रीगुसांईजी के ऐसें परम कृपापात्र भगवदीय हते । तातें इनकी वार्ता कहां तांई कहिए । वार्ता ॥१०॥ अब श्रीगुसांईजी के सेवक एक वैष्णव बनिया, गुजरात में रहतो, ताकी वेटी, जाको रामानदी सों ब्याह भयो, तिनकी वार्ता को भाव कहत हैं- भावप्रकाश-ये बनिया की बेटी तामस भक्त हैं । लीला में इन को नाम ' कृष्णानुचरी' है । सो ये पहिले द्वारिका लीला में ' तन्मध्या' की सखी ही। उन तें प्रगटी हैं। तातें उनके भावरूप हैं। ये जा प्रकार ब्रज-लीला में प्राप्त भई, सो आगें कहि आए हैं। वार्ता प्रसग-१ एक बनिया वैष्णव हतो । सो गुजरात में रहत हतो। श्रीगुसांईजी कौ परम कृपापात्र भगवदीय हतो। सो वाके घर बेटी जन्मी । सो एक समै श्रीगुसांईजी द्वारिकाजी पधारे हे।
