बनी मनमोहिनी जोगिनियाँ।
गल सेली तन गेरुआ सारी केस खुले सिर बैदी सोहिनियाँ॥
मातै नैन लाल रँग डोरे मद बोरे मोहै सबन छलिनियाँ।
हाथ सरंगी लिए बजावत गाय जगावत बिरह-अगिनियाँ॥*
जोगिन प्रेम की आई।
बड़े-बड़े नैन छुए कानन लौं चितवन-मद अलसाई॥
पूरी प्रीति रीति रस-सानी प्रेमी-जन मन भाई।
नेह-नगर मैं अलख जगावत गावत बिरह बधाई॥
जोगिन-अॉखन प्रेम-खुमारी।
चंचल लोयन-कोयन खुभि रही काजर रेख ढरारी॥
डोरे लाल लाल रस बोरे फैली मुख उँजियारी।
हाथ सरंगी लिए बजावत प्रेमिन-प्रानपियारी॥
जोगिन मुख पर लट लटकाई।
कारी घूँघरवारी प्यारी देखत सब मन भाई॥
छूट केस गेरुआ बागे सोभा दुगुन बढ़ाई।
साँचे ढरी प्रेम की मूरति अँखियाँ निरखि सिराई॥
( नेपथ्य में से पैंजनी की झनकार सुनकर )
अरे कोई आता है। तो मैं छिप रहूँ। चुपचाप सुनूँ। देखूँ यह सब क्या बातें करती हैं।
( जोगिन जाती है, ललिता आती है )
- चैती गौरी वा पीलू खेमटा।
