प्रताप पीयूष/जन्म सुफल कब होय?

by प्रतापनारायण मिश्र

करुना बरुनालय विष्णु की निरबल परजा संहरन।
⁠कलि भूपति सेन कसाय गत भारत के गारत करन॥६॥
केवल धन हित दरसावत झूठे सनेह कहं।
⁠काम अन्ध अज्ञानिन मूंड़हिं बात बात महं॥
करहिं आशरय दान चोर ज्वारिन व्यभिचारन।
⁠काल पाय सिखवहिं कुकर्म बालक अरु नारिन॥
कुटिलाई की कुशला सविधि मूढ़ धनिक सेवित चरन।
⁠कलि महाशक्ति कंचन जयतु भारत कहं गारत करन॥७॥
कोऊ काहू को न कतहुं न सतकर्म सहायक।
⁠केवल बात बनाय बनत सहसन सब लायक॥
कुटिलन सों ठग जाहिं ठगहिं सूधे सुहृदन कहं।
⁠करहिं कुकर्म करोरि छिपावहिं न्याय धर्म महं॥
कुछ डरत नाहिं जगदीश कहं करत कपटमय आचरन।
⁠कलियुग रजधानी कानपुर भारत कहं गारत करन॥८॥
इति श्री दग्ध हृदयाचार्य विरचितं ककाराष्टकं समाप्तम्।
⁠⁠⁠⁠-------------
⁠⁠जन्म सुफल कब होय?
⁠⁠श्री लार्ड रिपन उवाच।
सब कलंक सर्कार के जायं सहजही धोय।
"राजा राज प्रजा सुखी" जन्म सुफल तब होय॥१॥

⁠⁠⁠गौराङ्गदेव उवाच
नित हमरी लातैं सहैं हिन्दू सब धन खोय।
खुलै न “इङ्गलिश पालिसी" जन्म सुफल तब होय॥२॥
⁠⁠⁠पादरी साहब उवाच।
हम जो चाहें सो करें पै दुलखै मति कोय। :
जग हमार चेला बने जन्म सुफल तब होय॥३॥
⁠⁠⁠भेड़ राज उवाच।
हिन्दु मिलें बरु धूर में, बरु थूकहिं मोहि लोय।
पै अपनावहिं श्वेत प्रभु जन्म सुफल तब होय॥४॥
⁠⁠⁠गौरण्डदास उवाच।
जग जाने इङ्गलिश हमैं बाणी बस्त्रहि जोय।
मिटै बदन कर श्याम रंग जन्म सुफल तब होय॥५॥
⁠⁠⁠हज़रत उवाच।
घर न सनहकी हू रहैं कह नवाब सब कोय।
हिन्दू नित हम पर कुढ़ैं जन्म सुफल तब होय॥६॥
⁠⁠⁠सेठ उवाच।
बुधि विद्या बल मनुजता छुवहि न हम कहँ कोय।
लछमिनियां घर में बसै जन्म सुफल तब होय॥७॥
⁠⁠⁠अमीर उवाच।
हवा न लागे देह पर करें खुशामद लोय।
कोउ न खरी हमसे कहै जन्म सुफल तब होय॥८॥

⁠⁠⁠राजा उवाच
बरु ऊपरी दिखाउ में जाहि खजानों खोय।
तोप सलामी की बढ़ैं जन्म सुफल तब होय॥९॥
⁠⁠⁠बुढ़ऊ उवाच।
हारिल की लकरी गहे हमहि न छेड़ै कोय।
अंधियारेहि में तन छुटै जन्म सुफल तब होय॥१०॥
⁠⁠⁠लिकपिट्टन उवाच।
लोटिया थारी काल्हि ही लहनदार लें ढोय।
होय तारीफ़ बरात की जन्म सुफल तब होय॥११॥
⁠⁠⁠पुरोहित उवाच।
बनियन की बुधि धरम धन गंगा देहु डुबोय।
नित्त टका सीधा मिलै जन्म सुफल तब होय॥१२॥
⁠⁠⁠कनवजिया उवाच।
करिया अक्षर बिन हमैं कहैं त्रिवेदी लोय।
मरे बिटेवा मीच बिन जन्म सुफल तब होय॥१३॥
⁠⁠⁠बाल विधवा उवाच।
सती होन सर्कार दे नाहिं तु पंडित लोय।
पुनर्विवाह प्रचार ही जन्म सुफल तब होय॥१४॥
⁠⁠⁠कान्यकुब्ज कन्या उवाच।
मरैं बड़कुला और मम मरैं जु पुरिखा लोय।
चिट्ठी पठवें नर्क से जन्म सुफल तब होय॥१५॥

⁠⁠⁠वकील उवाच।
फूट बढ़ै सब घरन में हारे जीतै कोय।
खुली अदालत नित रहे जन्म सुफल तब होय॥१६॥
⁠⁠⁠ज़मींदार उवाच।
बरसे बिन बरसे कृषक जिमैं मरै चहु रोय।
पोत बढे़ काहू यतन जन्म सुफल तब होय॥१७॥
⁠⁠⁠पुलिस उवाच।
झूठी सांची कैसिहू वारिदात में कोय।
आय भलो मानुष फंसैं जन्म सुफल तब होय॥१८॥
⁠⁠⁠वैद्यराज उवाच।
कहुं मारी कहुं जीर्ण ज्वर सन्निपात महं कोय।
परै धनिक नित ही रहै जन्म सुफल तब होय॥१९॥
⁠⁠⁠भंडसारि उवाच।
इन्द्र देव किरपा करैं बूंद न बरसै तोय।
पांच सेर गेहूं बिकै जन्म सुफल तब होय॥२०॥
⁠⁠⁠आलसी उवाच।
सोवत सोवत एक दिन जाहिं भली बिधि सोय।
हाथ हिलावन ना परै जन्म सुफल तब होय॥२१॥
⁠⁠⁠बकुला भक्त उवाच।
माला कर महँ देखिकै आय फंसैं सब कोय।
खुलैं न हमरे गुप्त ढंग जन्म सुफल तब होय॥२२॥

⁠⁠⁠श्री हरिश्चन्द्र उवाच।
निज भाषा निज धर्म निज गौरव को सब कोय।
दिन दूनी बढ़ती करैं जन्म सुफल तब होय॥२३॥
⁠⁠⁠सम्पादन समूह उवाच।
कलह जवन देशन मचै सुधरैं हिन्दू लोय।
नित हमार ग्राहक बढ़ैं जन्म सुफल तब होय॥२४॥
⁠⁠⁠ब्राह्मण उवाच।
भारत हित भगवान हित सब जग के सुख खोय।
प्रिय हिन्दू एका करैं जन्म सुफल तब होय॥२॥
⁠⁠⁠----------------

कविता (विभिन्न)