प्रताप पीयूष/ककाराष्टक

by प्रतापनारायण मिश्र

⁠'कहा मैं क्या करूँ मरजी खुदा की'।
ज़मीं पर किसके हो हिन्दू रहें अब,
⁠'खबर लादे कोई तहतुस्सरा की'।
कोई पूछे तो हिन्दुस्तानियों से,
⁠'कि तुमने किस तवक्का पर वफ़ा की'।
उसे मोमिन न समझो ऐ बरहमन,
⁠'सताये जो कोई खिलकत खुदा की'।
⁠⁠⁠---------------
⁠⁠⁠ककाराष्टक।
कलह करावन माहिं परम पंडित कलुषाकर।
⁠कोटिन कल्पित पंथ प्रचारि सधर्म नीति हर॥
काम कला सिसु ताहि मोहिं सिखवत बल नासत।
⁠कहुं मंहगी कहुं कुरुज भांति भांतिन परकाशत॥
करके मिस दीन प्रजान कर सब प्रकार सरबस हरन।
⁠कलिराज कपटमय जयति जय भारत कहं गारत करन॥१॥
करुणानिधि पद बिमुख देव देवी बहु मानत।
⁠कन्या अरु कामिन सराप लहि पाप न जानत॥
केवल दायज लेत और उद्योग न भावत।
⁠करि बकरा भच्छन निज पेटहि कबर बनावत॥
का खा गा घा हू बिन पढ़े तिरबेदी पदवी धरन।
⁠कलह प्रिय जयति कनौजिया भारत कहं गारत करन॥२॥

कलिया और शराब बिना नहिं कौर उठावत।
⁠केश भेष महं निपट नजाकत नितहि दिखावत॥
केवल पूजा तजि न और आरजपन राखत।
⁠कौन दूसरी आस जु निज भाषहु नहिं भाषत॥
कसबिन संग काटत बयस वर एक न छत्रिय आचरन।
⁠कायस्थ बंश कलि प्रिय जयतु भारत कहं गारत करन॥३॥
कुलवंतन कहं देत कुकृति कर सविध सुभीता।
⁠कम दामन मद, मास, मीन, मैथुन चित चीता॥
काहू सो न कुपथिन कर कछु भेद बखानत।
⁠कौल धर्म के सकल सबिध संकेतहि जानत॥
कलवरिया तीरथ थापि बरबनि दीक्षित तारन तरन।
⁠कलि भंडारी, कलवार जय भारत कहं गारत करन॥४॥
कलह कुबच कुलवान सिसुन कहं सहज सिखावत।
⁠कांधे डोली धरि पापिन इत उत पहुंचावत॥
कोटिन कीटन मछरिन कहं हंसि २ संहारत।
⁠कबहुं चोर संग मिलत साह कर भवन उजारत॥
कंठी बांधे भगतहु बने घात न चूकत घुसि घरन
⁠कलि दूत कहारहु धन्य हैं भारत के गारत करन॥५॥
करत रहत पशु घात दया की छुवत न छाहीं।
⁠केवल नामहि हिन्दू यवन सांचहु कछु नाहीं॥
काहू कर नहिं शील करत ऐंठत सबही सन।
⁠करि निज पाप प्रसंस दुखावत रहत सुजन मन॥

करुना बरुनालय विष्णु की निरबल परजा संहरन।
⁠कलि भूपति सेन कसाय गत भारत के गारत करन॥६॥
केवल धन हित दरसावत झूठे सनेह कहं।
⁠काम अन्ध अज्ञानिन मूंड़हिं बात बात महं॥
करहिं आशरय दान चोर ज्वारिन व्यभिचारन।
⁠काल पाय सिखवहिं कुकर्म बालक अरु नारिन॥
कुटिलाई की कुशला सविधि मूढ़ धनिक सेवित चरन।
⁠कलि महाशक्ति कंचन जयतु भारत कहं गारत करन॥७॥
कोऊ काहू को न कतहुं न सतकर्म सहायक।
⁠केवल बात बनाय बनत सहसन सब लायक॥
कुटिलन सों ठग जाहिं ठगहिं सूधे सुहृदन कहं।
⁠करहिं कुकर्म करोरि छिपावहिं न्याय धर्म महं॥
कुछ डरत नाहिं जगदीश कहं करत कपटमय आचरन।
⁠कलियुग रजधानी कानपुर भारत कहं गारत करन॥८॥
इति श्री दग्ध हृदयाचार्य विरचितं ककाराष्टकं समाप्तम्।
⁠⁠⁠⁠-------------
⁠⁠जन्म सुफल कब होय?
⁠⁠श्री लार्ड रिपन उवाच।
सब कलंक सर्कार के जायं सहजही धोय।
"राजा राज प्रजा सुखी" जन्म सुफल तब होय॥१॥