प्रताप पीयूष/⁠हिन्दी हिन्दू हिन्दुस्तान ।

by प्रतापनारायण मिश्र

(२१८)

मुख में चारि वेद की बातैं, मन पर धन पर तिय की घातैं।
धनि बकुला भक्तन की करनी,'हाथ सुमिरनी बगल कतरनी'।।
⁠छोड़ि नागरी सुगुन आगरी उर्दू के रँग राते।
⁠देसी वस्तु विहाय विदेसिन सो सर्वस्व ठगाते ।।
⁠मूरख हिन्दू कस न लहैं दुखजिनकर यह ढंग दीठा।
⁠'घर की खांड़ खुरखुरी लागै चोरी का गुड़ मीठा'।।
तन मन सों उद्योग न करहीं, बाबू बनिबे के हित मरहीं।
परदेसिन सेवत अनुरागे,'सब फल खाय धतूरन लागे'।।
राखहु सदा सरल बरताव, पै समझहु सब टेढ़हु भाव ।
नतरु कुटिल जन निज गति छाटैं,'सूधे का मुह कुत्ता चाटैं।।
⁠समय को अपने जो सतसंग में बिताता है।
⁠हरेक बात में वह दक्ष हो ही जाता है।।
⁠किसी को क्या कोई शिक्षा सदैव देता है।
⁠'चौतरा आपही कुतवाली सिखा लेता है'।।
⁠⁠⁠⁠⁠('लोकोक्ति-शतक'से)
⁠⁠⁠⁠--------------
⁠⁠हिन्दी हिन्दू हिन्दुस्तान ।
चहहु जो सांचहु निज कल्याण । तौ सब मिलि भारत सन्तान ।।
जपहु निरन्तर एक ज़बान । हिन्दी हिन्दू हिन्दुस्तान ॥१॥
रीझै अथवा खिझै जहान । मान होय चाहै अपमान ।
पै न तजौ रटिबे की बान । हिन्दी हिन्दू हिन्दुस्तान ॥२॥

(२१९)

भाषा भोजन भेष-विधान । तजै न अपनो सोइ मतिमान ।
बस समझौ सौभाग्य प्रमान । हिन्दी हिन्दू हिन्दुस्तान ॥३॥
धनि है वह धन धनि वे प्रान । जो इन हेतु होंय क़ुरबान ।
यही तीन सुख सुगति निधान । हिन्दी हिन्दू हिन्दुस्तान ॥४॥
तिहूं लोक पर पूज्य प्रधान । करिहैं तव त्रिदेव इव त्रान ।
सुमिरहु तीनहु समय सुजान । हिन्दी हिन्दू हिन्दुस्तान ॥५॥
सरबसु जाय दीजिये जान । सब कछु सहिये बनि पाखान ।
पै गहि रहिय प्रेम प्रन ठान । हिन्दी हिन्दू हिन्दुस्तान ॥६॥
तबहिं सुधरिहै जनम निदान । तबहिं भलो करिहैं भगवान ।
जब रहिहै निसदिन यह ध्यान । हिन्दी हिन्दू हिन्दुस्तान ॥७॥
जिन्हें नहीं निजता को ज्ञान । वे जन जीवत मृतक समान ।
याते गहु यह मंत्र महान । हिन्दी हिन्दू हिन्दुस्तान ।।८।।
⁠जब लगि तजि सब शंक सकुच अरु आस पराई ।
⁠नहि करिहौ निज हाथन आपनी भलाई ॥
⁠अपनी भाषा भेष भाव भोजन भाइन कहँ ।
⁠जब लगि जग ते उत्तम नहिं आनि हौ तुम जिय महँ ।।
⁠तब लग उपाय कोटिन करत अगनित जनम बितायहौ।

⁠पै सांचो सुख सम्पति सुजस सपनेहु नहिं लखि पायहौ ।।९।।

---