भ्रमरगीत-सार/३३६-बारक कान्ह करौ किन फेरो

by रामचंद्र शुक्ल

 

राग सारंग

⁠बारक कान्ह करौ किन फेरो?
दरसन दै मधुबन को सिधारो, सुख इतनो बहुतेरो॥

भलेहि मिले बसुदेव देवकी जननि जनक निज कुटुँब घनेरो।
केहि अवलंब रहैं हम ऊधो! देखि दुःख नँद-जसुमति केरो॥
तुम बिनु को अनाथ-प्रतिपालन, जाजरि^[१] नाव कुसँग सबेरो^[२]।
गए^[३] सिंधु को पार उतारै, अब यह सूर थक्यो ब्रज-बेरो^[४]॥३३६॥

1. जाजरि=जर्जर, जीर्ण।
2. सबेरो=सब।
3. गए=कृष्ण के चले जाने पर।
4. बेरो=बेड़ा।